究竟咩係夏令同冬令時間？ 啱啱英國喺今日變做夏令時間，好在而家係停攞期間，工作都停埋。 如果唔係又要訓少個鐘….
我嘗試解釋一下夏令同冬令時間。
咩係夏令同冬令？
簡單講英國夏令時間由2020年3月29日開始，倫敦同香港嘅時差㑹變做7個鐘。
大家應該有聽過格林威治時間(Greenwich Mean Time), 基本上每年到三月時，我哋就要將個鐘較快一個鐘，較咗之後呢個時間叫”夏令時間”。
到咗十月，又要由夏令時間較返慢一個鐘，較返之後就叫”冬令時間”，呢個冬令時間其實就係所謂”格林威治標準時間”。
格林威治
呢個名應該大家成日聽，其實佢係指格林威治天文台。咁啱我以前住東邊，行15分鐘就到呢個天文台，嗰邊個環境都幾靚吓，春天仲有櫻花路，好似日本咁靚。
呢個天文台有咩咁巴閉？1884年，國際子午線會議通過咗，以通過格林威治嘅天文台的經線為本初子午線。呢條線就勁，全世界24個時區都係以佢呢條線做基礎去加減。
咩時間實行夏令同冬令？
夏令： 每年3月最後一個星期日，至10月最後一個星期日結束。
冬令：夏令結束後開始。
點解要有夏令同冬令？
個原因相當有關，原來係為咗充分利用陽光，縮短照明個時間，令到節省能源。因為英國夏天本身好早天光，所以如果早起一個鐘，就可以用多一個鐘陽光。
聽聞仲係為咗等人早睡早起，健康d咁話。
點解香港無冬夏令時間？
原來香港八十年代都有冬夏令時間！
天文台個網頁仲有夏令時間個紀錄：
https://www.hko.gov.hk/tc/gts/time/Summertime.htm
詳情可以睇呢度： https://www.vjmedia.com.hk/articles/2017/06/30/163155
大家可以睇下上面個原因， 我就總結講結果。
因為就算有夏令時間都係慳咗0.5%能源，同埋市民都相當反對呢個措施。
其實真係幾煩，又要成日較錶，同埋重點係你㑹訓少一個鐘… (冬令時間㑹還返比你）